urutan mambere hiou pakon umpasa ni

 Tar songon on ma urutan ni ulos si pasahathon ni parboru:

1. Ulos Pansamot= Natoras (Amang/Inang) ni Pangoli
2. Ulos hela + mandar = Pengantin
3. Ulos tu Pamarai
4. Ulos ni Anak Manjae = Simanggokhon
5. Ulos ni Sihunti Ampang
6. nomor 6 s/d seterusnya sesuai dengan jumlah yang di sepakati. Somalna daftar Si jalo ulos nunga denggan di atur.

Taringot tu hata na pasahat ulos tar songon on ma :

Ulos Pansamot/Ulos Pargonggom, Napasahathon parboru tangkas, hatana :

Dihamu Lae dohot di Ibotonghu, Parjolo ma hita mandok mauliate tu adopan ni Amanta Pardenggan Basa i, di naung manjalo pasu-pasu parbagason Anakhonta, Anakmu – Helanami, Borunami-Parumaenmu sian Tuhanta di Bagas JoroNa marhite-hite naposo ni Tuhanta.
Dison ro do hami pasahathon Ulos Pansamot tu hamu Lae asa sai margogo ma hamu Lae mangalului pansamotan laho marmudu-mudu Hela dohot Borunami on naung gabe Parumaenmuna jala laos Ulos Pargonggom ma on dihamu Ibotonghu dohot pangidoannami asa gonggom ma Ito Parumaenmon asa gabe sada Ina siboan Las ni roha dohot dame ibana ditonga-tonga ni keluargamu.
Ulos naganjang ma Ulos on, Ulos nabidang jala sitorop Rambu, mardongan tangiangnami tu Tuhanta Pardenggan Basa i, sai ganjang ma umurmu, dao angka parsahitan, :

Andor halumpang ma togu-togu ni lombu, Andor hatiti togu-togu ni Horbo, sai saur matua ma hamu Lae dohot ibotonghu, togu-toguon ni pahompu sahat tu namarnini-marnono.

Ulos nabidang ma Ulos on, sai asi ma roha ni Tuhanta, dilehon dope dihamu angka pansalongan nabidang:

Binanga ni Siporing binongkak ni Tarabunga,

tu sanggar ma amporik, tu lubang ma satua, sai sinur ma napinahanmuna gabe nang naniulamuna.

 

Ulos sitorop rambu ma uloson, sai tu toropna ma angka pomparan mu angka anak partahi jala ulubalang dohot angka Boru nauli basa tubu ni Parumaenmon.

Sahat saha ni solu ma sahat tu bontean, hupasahat hami ma Ulos Herbang on tu hamu Lae, Ito,

sai lengleng ma hamu mangolu, sai horas sahat tu panggabean.

 

Las ma rohamuna manjalo. (huhut ditortorhon – diuloshon sian siamun ni amanta sijalo ulos sahat tu hambirang ni inanta si jalo ulos, rade ma Inanta manjalo laos gabe rap ma nasida padomu ujung ni ulosi ).

ULOS HELA + Mandar Hela, Napasahathon parboru tangkas, hatana:

Di hamu Amang Hela dohot di ho Inang, Boru Hasianhu, sadarion nunga di jalo hamu pasu-pasu parbagason sian Tuhanta marhite naposona di Bagas Joro ni Tuhanta. Sidok mauliate ma hamu ala sudena i, ai ido dipangido Debata sian hamu marhite-hite Tuhan Jesus Kristus” siala ni naung dipungka hamu parsaripeon on, dison ro do hami laho pasahathon tu hamu Ulos Herbang, ulos naganjang, ulos nahapal sitorop rambu. Nunga dipadomu Debata hamu gabe sada Ripe Naimbaru, Sai ganjang ma umurmu, sai Tuhanta ma namangaramoti hamu dingolumu, dao ma nasa parsahitan.
Ulos Nahapal ma Uloson, sai dipahapal Debata ma dihamu holong ni roha dohot Dame i. Asa songon nidok ni umpama ma:

Pege sangkarimpang, Hunik sahadanghadangan,

mangangkat ma hamu rap tuginjang, manimbung rap tu toru tongtong satahi saoloan.

Sinimbur ni pangkat ma tu sinimbur ni hotang,

tudia pe hamu mangalangka sai mamasu-masu ma Tuhanta, disi ma hamu dapotan parsaulian.

Ulos sitorop rambu ma Ulos on dohot tangiangnami mangido tu Tuhanta:
Tubuan laklak tubuan singkoru didolok ni purbatua, Sai Asi ma Roha ni Tuhanta, tubu ma di hamu Anak partahi jala ulubalang dohot Boru angka nauli basa donganmu sahat tu na saur matua.

Andor ras ma tu andor ris, bulung ni tobu pangarahutna, hupasahat hami ma Ulos Herbangon tu hamu, sai horas ma hamu jala torkis diramoti holong ni roha ni Tuhanta.

Sahat-sahat ni solu ma sai sahat tu bontean, sai leleng ma hamu mangolu sai horas sahat tu panggabean.

(huhut ditortorhon – diuloshon sian siamun ni helai sahat tu hambirang ni boruna, rade ma Inanta manjalo laos gabe rap ma nasida padomu ujung ni ulosi ). Dung i di uduti ma muse.
Di hamu Amang Hela, dison mandar Hela huampehon hami tu Abaramu, martanda ma hamu Helanami asa unang marnaloja hamu mangulahon angka ulaon namasa ditonga-tonga ni angka hula-hulamu. Horas ma. (diumma laos masijalangan). Laos mulak ma hasuhuton parboru tu podium. Adong deba variasi andorang so tu podium parboru manogu/ pajongjong penganten laos mardalan ma penganten pasahat bunga pangkuan tu tulang ni si boru muli dohot tulang ni si bao pangoli, dungi mulak ma nasida tu podium. (angka nauli ma i sude molo dibagasan las ni roha).

ULOS PAMARAI, napasahathon SIJALO BARA, hatana:
Hatana: Di hamu Amangboru dohot di Namborunami (Lae dohot Ibotonami) dison ro hami pasahathon Ulos Herbang, Ulos Pamarai tu hamu, Ulos naganjang, Ulos nabidang sitorop rambu dohot tangiangnami mangido tu Tuhanta Pardenggan Basai; sai ganjang ma umurmu, sai dao ma parsahitan; Ulos nabidang ma on sai dilehon Tuhanta dihamu bidang angka parsaulian dohot pansamotani. Asa sai tongtong dibagasan hahipason jala dibagasan las niroha hamu sauduran angka namarhaha-maranggi, masitungkol-tungkolan songon suhat dirobean di sude angka ulaon dohot namasa ditonga-tonga muna. Ulos sitorop rambu ma ulos on, sai torop ma pomparanmu tu joloan on. Jalo hamu ma Ulos Herbang on Amangboru dohot namboru (lae dohot Ito) Andor halumpang ma togu-togu ni lombu, dipasu-pasu Tuhanta ma hamu saur matua sahat tu naditogu-togu pahompu. Las ma rohamu.

Ulos ni Simanggokhon (tu Anak Manjae), napasahathon SIMOLOHON, hatana:

Di hamu Berenami (Laenami) Simanggokhon di ulaon parsaripeon ni Helanami dohot Borunami, dison ro hami pasahathon Ulos herbang tu hamu, Ulos ni si Simanggokhon di goari Ulos on.
Ulos naganjang, Ulos nahapal, Ulos sitorop rambu, sai ganjang ma umurmu dibagasan parhorasan, sai lam tu hapalna ma holong ni rohamu mangurupi natorasmu nang mangalugahon parsaripeonmu, sai torop ma pomparan di hamu sibahen las ni rohamu jala songon nidok ni umpama:
Sitorop ma dangkana, sitorop ma rantingna, gabe jala mamora hula-hulana, songoni ma nang ianakhonna.
Sahat sahat ni solu ma sahat tu bonten, sai leleng ma hamu mangolu, sahat tu parhorason sahat tu panggabean.

Jalo hamu ma Ulos on.

ULOS SIHUNTI AMPANG, napasahathon haha/anggi kandung ni suhut bolon, Hatana:

Dihamu Berenami si hunti Ampang di parsaripeon ni Hela dohot Borunami, dison ro hami pasahathon Ulos herbang tu hamu, Ulos ni si Hunti Ampang digoari Ulos on.
Ulos naganjang, Ulos nahapal, Ulos sitorop rambu, sai ganjang ma umurmu dibagasan parhorasoni, sai lam tu hapalna ma holong ni rohamu mangoloi hula-hulamuna, sai torop ma pomparan di hamu sibahen las ni rohamu jala songon nidok ni sijolojolo tubu ma dohonon :
Sitorop ma dangkana, sitorop ma rantingna, gabe jala mamora hula-hulana, songoni ma nang Boruna.
Sahat sahat ni solu ma sahat tu bonten, sai leleng ma hamu mangolu, sahat tu parhorason sahat tu panggabean.

Jalo hamu ma Ulos on.

Tambahan ni sijalo ulos namangihut ima tu :

Haha/Anggi ni Amang ni Suhut = sijalo Ulos Todoan, napasahathon Haha/Anggi ni Amang Suhut Parboru

Boru ni Suhut namarhaha maranggi = boru tubu, napasahathon sijalo upa parorot/upa pariban

Pomparan ni Ompung ni Suhut marhaha/maranggi = sijalo Ulos Todoan/Panhaei, napasahathon Pomparan ni Ompung ni Suhut Parboru namarhaha/maranggi

Pomparan ni Amang mangulahi ni Suhut = sijalo Ulos Todoan/Bola Tambirik, napasahathon Pomparan ni Amang mangulahi ni Suhut Parboru.

Ulos tu punguan parompuon = ibaratna molo Sitorus, Punguan Pomparan Raja Mandidang Se- Jabotabek, napasahathon Pengurus punguan parompuon marga ni parboru.

Ulos tu Punguan Marga = ibaratna molo Sitorus, Parsadaan Raja Sitorus dohot Boruna Se Jabotabek, napasahathon Pengurus ni Parsadaan/Punguan marga ni parboru Se Jabotabek